"عندنا النهارده عزومة كبيرة أوى ده إحنا عازمين فلان وعلان وأولادهم كمان" بالتأكيد نسمع هذه الجملة في العديد من أيام شهر رمضان الكريم لكن يا ترى النجمات الشابات بيقولوها على مين وبيعزموا مين على الإفطار!!

بعزم ماما وأخواتي على الإفطار لكن
خارج المنزل

سمية الخشاب: بعزم ماما وأخواتي على الإفطار لكن خارج المنزل لان أنا قاعدة معاها في البيت واكتر الأطعمة اللي بنحبها المأكولات البحرية رغم أن ناس كتير مبتحبش السمك مثلا على الإفطار لكن اعمل إيه أنا اسكندرانية والسمك ده أكلتي المفضلة وماما كمان بتحبه أوى ولازم طبعا شوربة السي فود دي وجبتنا الأساسية.

شيري: ماما هي اللي بتعزم مش أنا بالعكس مش بحب ولا اعزم ولا أتعزم لكن ماما بتخلي بيتنا تقريبا طول الشهر مليان بأهلنا وأقاربنا لكن اكتر ناس بنحرص على عزومتهم هم أولاد خالتي وطبعا خالتي وزوجها وأحيانا أولاد عمتي وأزواجهم لكن أهل ماما بنعزمهم اكتر.

ميرنا المهندس: أنا بحب عزومات رمضان أوى لأني بحس معاها فعلا برمضان بس محبش أكون معزومة لأني حتى في الأيام العادية مش بحب أكون معزومه عند حد وخاصة لو في مطعم مثلا بحس أنى مش بأكل على راحتي.

منه فضالي: ماما تخصص عزومات في رمضان وغير رمضان يعني بتحب جدا تملا البيت بالناس وبتحب برضو تكون معزومة لكن في مشكلة بتحصلنا دايما في العزومات وهي أنى أنا مش بحب أبدا أكل أي حاجه فيها دهون والعزومات طبعا بتكون مليانه عشان كده ساعات كتير بعتذر ومبرحش مع ماما عزوماتها.

نيلي كريم: أنا في رمضان ممكن اعزم لكن مبحبش اتعزم وبحرص أنى اعزم أهلي المقربين جدا زي خالتي وعمي وعمتي لكن أقارب الدرجة التالته لا مش بعزمهم.

هند صبري: أنا أول سنة في الجواز بصراحة مكنتش بحب اعزم حد خالص كنت بخاف أوى على الشقة إنها تتبهدل ولا حاجه بس كنت ممكن اقبل العزومات والناس اللي بتعزم عندهم لازم طبعا أرد لهم العزومة بس كنت بردها خارج المنزل لان أطفال أقاربي اشقيا جدا وبيبهدلوا الدنيا.