طالبت الفنانة جوري بكر بإلغاء مسابقة ملكة جمال مصر 2024، وذلك بسبب سوء تنظيم الحفل، مشيرة إلى أن المسابقة قائمة على المجاملات الشخصية، إذ يتم اختيار الفائزة قبل الحفل بدون حيادية أو عدالة، على حد قولها. وقالت «جوري» عبر حسابها الشخصي على «فيسبوك»: «ممكن تلغوا مسابقة ملكة جمال مصر بجد والمسميات الأخرى للنوع ده من المسابقات وأي إن شاء الله ملكة جمال مصر للعالم انتم هبل لأنها حرفيا فاشلة بسبب سوء التنظيم والعبث اللى بيحصل فيها وأنها مسابقه مقامة على المجاملات والمصالح وأشياء أخرى كتيرة للأسف».

وأضافت: «مش هقدر اتكلم عنها وأنصح أي بنت متنخدعش بالنوع ده من المسابقات لأنها هتفشل وهتتعقد لانهم من أول يوم بيكونوا عارفين مين اللى هتكسب وده للأسف بيحصل في مصر بس فارجوكم كفاية المسابقات دي بتقضي على بنات لسه في مقتبل عمرهم عندهم طموحات وأحلام كتير بتضيعوا مستقبلهم وبتحسسوهم بخيبة أمل».

وتابعت :«في الآخر بيكسبوا أكتر واحدة فاشلة وممكن يكون في كذا واحدة تانية من المتسابقات أحسن منها ألف مرة، آخر مسابقة ملكة جمال هي ٢٠١٤ غير كده لا أعترف شكرا».

عودة جوري بكر لزوجها
تحدثت الفنانة جوري بكر عن موقفها مؤخرا تجاه طفلة رضيعة وجدتها ملقاة في الشارع دون اهتمام لتقوم بتنظيفها. وتابعت جوري بكر خلال مداخلة هاتفية مع برنامج «تفاصيل»، الذي تقدمه الإعلامية نهال طايل عبر «صدى البلد 2» :«من بعد ما بقيت أم الموضوع بقى صعب وأي بنى آدم هيشوف المنظر ده مع أم وطفلتها رضيعة في درجة حرارة صعبة هيعمل كده».

وتابعت جوري بكر: «أي ست هتشوف المنظر ده وخاصة الأم هيصعب عليها الموقف لأنها ملهاش مأوى والطفلة رضيعة كانت في حجم ابني الصغير وهي وحشتني أوي زي ما كنت متعودة أشوفها». وأضافت: «اتأثرت بيها وكان نفسي أربيها مع ابني بس ده مسؤولية كبيرة عليا وحاولت أساعد أمها بس هي رفضت وهربت وخدت البنت ومشيت وبتمنى تكون البنت بخير وكويسة وبدعيلها كل يوم». وأشارت جوري بكر إلى أن انفصالها عن زوجها وعودتهما سريعًا لم يكن من أجل «الترند»، وأضافت: «أي ست مجنونة بتنفعل وبتتعصب على حاجات تافهة ممكن تعمل أي تصرف غصب عنها والسوشيال ميديا ده مكان لأخبار الفنانين واللي عملته غلط لأني مش المفروض أتكلم عن حياتي الشخصية».

وتحدثت جوري بكر عن هجوم البعض عليها بسبب قبلتها لشقيقتها، قائلة: «معرفش الناس بتهاجم ليه يمكن دي صفحات الناس بتسلطها عليا وأنا وغيري من الفنانات بنعمل كده وأخدنا الصورة دي أنا واختي وإحنا صغيرين وحبينا نعملها لما كبرنا والموضوع بسيط». ونفت جوري بكر ما قالته في تصريحات صحفية بأن: «جمال مي عمر مينفعش في الشعبي»، مؤكدةً أن مي رشحتها في مسلسل جعفر العمدة وتجمعها علاقة صداقة قوية بينها وبين زوجها المخرج محمد سامي.