نشر الفنان رامي صبري صورة قديمة له من قبل 23 عاماً، حكى من خلالها قصة بدايته بمجال الغناء، وحتى بلوغه مصاف النجوم. وقال رامي صبري أنه كان يغنّي ضمن كورال الفنان محمد الحلو، وتدرج بالعديد من المحطات الفنية حتى وصل لما هو عليه الآن. وعلّق رامي صبري على الصورة قائلا: "صورة من 23 سنة، كنت بشتغل كورال مع المطرب الكبير محمد الحلو، وكنت وقتها بادي أشتغل عشان أفهم يعني إيه مسرح و جمهور، و إزاي أتعامل مع الناس في الشغل".

ثم أضاف: "كنت دايماً اعرف إنها مرحلة تعليمية وهتمشي، ومش هقف عندها عشان كده مكنش عندي طموح فيها، فضلت أشتغل كورال مع معظم النجوم ساعتها لحد ما لحنت لفضل شاكر وعامر منيب الله يرحمه، وبعدين شيرين أول ما ابتدت، وكل ده عارف إن هدفي لسة مجاش".

واستكمل: "بعد كل اللي فات والتعب والمجهود الكبير جداً ربنا كرّمني كرم كبير جداً وميّزني من وسط فنانين كتير جداً وخلاني أكون واحد من أهم نجوم العالم العربي، الموضوع كله صدقني في الطموح، لو أنت بتحب نفسك ومآمن بنفسك وعندك الإصرار إنك هتوصل لمكان أنت مش فيه دلوقتي، صدقني هتوصل بس تصدق نفسك، ومفيش حاجة اسمها حظ، دي كلمة محصلتش معايا... مع حبّي للموسيقى وطموحي وأنا ماشي فيها، في واحد معايا في نفس الصورتين وهو أخي وصديق العمر والموزع الموسيقي وعازف الكيبورد الأستاذ محمد سمير، هو كمان طموحه كبير جداً وابتدى معايا في الصورة اللي فوق لحد ما بقي أحد أهم موسيقيين مصر، وبيلعب مزيكا مع أهم نجوم عالمنا العربي، ولسه مكمل معايا من 23 سنة لحد الآن، وهو مدير فرقتي الموسيقية".

واختتم رامي صبري حديثه قائلاً: "عاوز أقول في الآخر، طموحك وحبك لنفسك هيوصلك، ماترميش شماعه الظروف على نفسك وتقول ظروفي وحظي وتدخل في مود مش هيوصلك لحاجة، هتوصل هتوصل صدّقني، وأول ما هاتنجح كله هيجري وراك ويسقف لك، والفرق بين الصورتين هو الطموح فقط".

تابعوا جميع المسلسلات عربية وتركية ومدبلجة مجانا في موقع مسلسلات اون لاين هنا: مسلسلات عربية وتركية

تابعوا جميع حلقات مسلسل "كريستال" مجانا وبجودة عالية في موقع مسلسلات اون لاين هنا: كريستال